3 décembre 2021

Iterambere ry’umukenyezi, bisigura ko umukenyezi yigurira ivyo akeneye atarinze kubisaba umugabo

«Iyo tuvuze iterambere ry’umukenyezi,  tuba dushaka ko umukenyezi ico akenera ashobora kucigurira atarinze kurindira ko umugabo akimuha. Akigurira igitenge canke ibindi vya nkenerwa, maze uburyo bw’umugabo bugakora ibindi ». Ivyo ni bimwe mu vyashikirijwe na Nyakubahwa Imelde SABUSHIMIKE, Umushikiranganji  wo Gushigikirana, Imibano, Agateka  ka Zina Muntu n’Iterambere Ridakumira kuri uyu wambere igenekerezo 28 ruheshi 2021, aho yari yishikiye kuraba  ivyaranguwe n’ishirahamwe TWIZERANE ryo ku mutumba NYARUBENGA, Commune NYARUSANGE intara ya GITEGA.

Nyakubahwa Imelde SABUSHIMIKE, Umushikiranganji wo Gushigikirana, Imibano, Agateka ka Zina Muntu n’Iterambere Ridakumira (i bubamfu) ku mutumba NYARUBENGA, Commune NYARUSANGE intara ya GITEGA (Ifoto na Elie HARINDAVYI)

Nyakubahwa Imelde SABUSHIMIKE yarakeje abo bakenyezi ku ntambwe bagezeko mw’iterambere, aho bamwe yasanze bamaze kugura inka, amatongo, impene, inkoko, bimbura ibihagije mbere bagasagurira isoko, abana babo nabo bakaba biga ata ngorane.

Digne NTIMPIRANGEZA, arongoye ishirahamwe TWIZERANE ( ifoto na Elie HARINDAVYI)

Digne NTIMPIRANGEZA, arongoye ishirahamwe TWIZERANE arashimira cane Nyakubahwa Umushikiranganji baravye urugero bagezeko mw’iterambere.

Yamenyesheje ko Ishirahamwe ryabo rigizwe n’abakenyezi 30, batanguye baziganya kuva kumafaranga 500 gushika kuri 2000, bongera baguranana.

Mu nyuma Ubushikiranganji bwo Gushigikirana, Imibano, Agateka  ka Zina Muntu n’Iterambere Ridakumira bufashijwe na FNUAP burabaha ingurane y’umuriyoni w’amarundi (1.000.000FBU), baca barongereza amahera bahora bagurana. Ati niho baciye bashika ku ntambwe bagezeko ubu mw’iterambere.

Devote NDEREYIMANA, umwe mu banywanyi b’iryo shirahamwe TWIZERANE arashinga intahe y’intambwe (ifoto na Elie HARINDAVYI)

Umupfasoni Devote NDEREYIMANA, umwe mu banywanyi b’iryo shirahamwe,  aba ku mutumba NYARUBENGA, Commune NYARUSANGE intara ya GITEGA, yamenyesheje ko we yahereye ku mutahe w’10.000, adandaza ibitoke, aca agura inkoko, mu nyuma ingurube none ubu afise n’inka yaguze ibihumbi 450.000 vy’amarundi.

Nyakubahwa Umushikiranganji Imelde SABUSHIMIKE amaze kwiyumvira no kwibonera ivyo bagezeko mu kiringo kitarezna imyaka itatu, yarashimye yongera aranabatera intege cane ngo babandanye batera  imbere.

Yabipfurije kuzokorera mu ngata Ubushikiranganji  bwo Gushigikirana, Imibano, Agateka  ka Zina Muntu n’Iterambere Ridakumira mu kuja kwigisha abandi bo ku yindi mitumba itarashika ku ntambwe nk’iyo.

Akaba yabemereye ko Ubushikiranganji arongoye buzokwama bubashigira muri vyose.

Ifoto ya Rusangi Nyakubhwa Umushikiranganji Imelde sabushimike ari lkumwe n’uwaserukire ishirahamwe FNUAP ku mutumba NYARUBENGA (Ifoto na Elie HARINDAVYI)

Mwomenya ko Iyo ngurane yari yatanzwe n’Ubushikiranganji  bwo Gushigikirana, Imibano, Agateka  ka Zina Muntu n’Iterambere Ridakumira kugira ngo yunganire abo bakenyezi ngo bagurane uduhera turwiriye, bashire mu ngiro imigambi yisununuye mu kiringo c’imyaka 3. Akazoca ahabwa ayandi mashirahamwe yitunganije neza, nayo aheze yisununure mu gushira mu ngiro Imigambi ikomeye y’iterambere y’ingo zabo.

Elie HARINDAVYI

Le Coordonnateur de la Cellule de Communication et d'Information du Ministère des Droits de la Personne Humaines, des Affaires Sociales et du Genre

Voir tous les articles de Elie HARINDAVYI →