par Kuri uyu wa kane, igenekerezo rya 27 Mukakaro 2023, Nyakwubahwa Imelde SABUSHIMIKE, Umushikiranganji wo Gushigikirana, Imibano, Agateka ka Zina Muntu n’Iterambere Ridakumira, arikumwe na Mugenzi we, Nyakwubahwa Martin NITERETSE, Umushikiranganji muvyo ajejwe harimwo umutekano n’iterambere Rusangi, baragirishije inama idasanzwe yo gutegurira hamwe umusi mukuru wahariwe gushigikirana mu kibano, aho hatororokanywa imfashanyo ku mitumba yose igize igihugu, mu makomine yose no muntara zose, zigenewe gufasha abafise amikoro make.
Iyo nama ikaba yagirishijwe ba Buramatari b’intara zigize igihugu c’Uburundi, ba Musitanteri b’amakomine yose, abayobozi bakurubakuru, abayobozi muntara bajejwe iterambere ry’ingo n’imibano, hamwe n’abandi bakozi batandukanye bakukira ubwo bushikiranganji bubiri.
Mw’ijambo ryiwe, Umushikiranganji ajejwe gushigikirana yamenyesheko ko iyo nama yateguwe muntumbero yo kunagura umugenzo mwiza wo gushigikirana mukibano, aho yerekanyeko uwo muco watitutse ufatiye kuvyegeranyo vyerekana uburyo n’ibintu vyegeranijwe mumwaka uheze muntumbero yo gufasha abafise amikoro make. Yakomeje kuvuga ko intambamyi nyamukuru yibonekeza ari uko abenegihugu batavyitabira k’urugero rushimishimije, uhereye kubavukantara, abavukakomine gushika no kumitumba ndetse no ma makaritiye.
Aha akaba yaratanze uturorero nk’aho muvyegeranyo vyerakana ko nk’intara ya Rumonge yimbura amavuta menshi usanga intara yose yegeranije amabido atarenga 2 gusa y’amamesa ahariwe gushigikira ba ntahonikora, yongerako ko no muntara zimbura umuceri mwinshi canke imyumbati myinshi batitanze bikwiye, aho usanga hatanzwe nko k’urwego rw’intara ibiro 180 vy’umuceri, ugasanga no mu ntara zivukamwo indongozi zitandukanye, abashingamateka, abakenguzamateka, abashikiranganji , intwazangabo zo mu rwego rwo hejuru n’iziciriritse, abadandaza bakaruhariwe, abikorera ivyabo mubisata bitandukanye, abakozi ba reta bafise imishara ibombotse ugasanga muntara hatanzwe ibihumbi bitarenga 300 000 vy’amarundi.
Mugusozera ijambo ryiwe, yasavye ashimitse ko abajejwe intwaro na canecane, ba Musitanteri bofata muminwe ikibazo c’abafise amikoro make bari mu makomine iwabo, ati ntihagire bantahonikora bazosubira kuza kwugariza ubushikiranginji baje gusaba utwo bafungura, umuceri canke uduharage, barenganye Musitanteri muri komine hamwe n’abakozi b’ubushinganji bajejwe iterambere n’ imibano bo mw’ikomine, ba Buramatari n’abayobozi bajejwe iterambere ry’ingo n’imibano muntara, bakaza mubiro vy’ubushikiranganji.
Arangiza avugako mu biro vy’ubushikiranji hoshikanwa ikibazo cananiranye kuri izo nzego zose.
Nyakwubahwa Martin NITERETSE,Umushikiranganji ajejwe Intwaro yo hagati mugihu, Iterambere Rusangi n’Umutekano amaze gufata ijambo, yamenyesheje ko mumpinyaruro zigiye gukorwa zo gutegura uwo Munsi mukuru, ba buramatari bofata iyambere muguhimiriza abenegihugu muri rusangi na canecane kuba aribo bonyene ubwabo boshikira abavukantara bafise uburyo canke amabanga ahambaye mugihugu, babamenyeshe uwo musi wimirije bongere babahimirize kuwushigikira. Yongerako ko ba Musitanteri bazohimiriza abandi benegihugu basigaye. Yamenyesheje kandi ko bazosuzuma ivyatanzwe kuntara , k ‘umutumba, no mu makomine bakaraba intara izoba iyambere.
Ati ico kizoba ari urupimo tugiye kubarabirako ingene abenegihugu babayoboka, kandi aca abizeza ko intara zose zizoshobora gukora neza bose bakaja kurugero rumwe muri ico gikorwa.
Uyo mwubahwa yasavye ko aboshirwa kuntonde za bantahonikora bazofashishwa ibizoba vyabonetse boba ari abagendana ubumuga butuma badashobara kurangura umurimo n’umwe wokwibeshaho, nk’ abakehabwenge, abageze mu zabukuru n’abandi bigaragara vy’ukuri ko bakeneye ubufasha gusumba abandi.
Mwomenya ko uwo munsi uzohimbazwa kw’igenekerezo rya 4 Myandagaro 2023, buca hahimbazwa Umunsi Mukuru wahariwe amakomine uzoba kw’igenekerezo rya 5 Nyandagaro 2023.
