par Kuri uyu wakabiri igenekerezo rya 25 Mukakaro 2023, muri Komine Nyabihanga Intara ya Mwaro, Nyakubahwa Imelde SABUSHIMIKE, Umushikiranganji wo Gushigikirana, Imibano, Agateka ka Zina Muntu n’Iterambere Ridakumira, yaritabiriye igikorwa co gusozera umugambi watangujwe n’Ubushikiranganji aramutswa, mugihe bariko barihweza ivyaranguwe mu mugambi wo « Kwigisha no gushigikira abakenyezi bafise amikoro make ngo bisununure mubijanye n’ubutunzi mukwitunganiriza imigambi no mu gukoresha ubuhinga bwa none » (Autonomisation socio-économique des femmes de Mwaro à travers l’entrepreneuriat et la digitalisation) wafashwe mumugongo na PNUD.
Abakenyezi bafise amikoro make bangana 3 278 bahurikiye mumakoperative 133 nibo bashigikiwe n’uwo mugambi, ubu bakaba barateye intambwe igaragara kuko bahinduye imibereho ugereranije n’uko bari bifashe imbere y’uko bashigikirwa n’uyo migambi. Ivyo bikaba bishikirizwa nabo bakenyezi nyene.
Imelde SABUSHIMIKE aramutswa ubushikiranganji muvyobujejwe harimwo iterambere ridakumira yahamagariye abakenyezi bamaze kwiyunga bakaja hamwe mumashirahamwe n’amakoperative bakaba barigishijwe kwitunganiriza imigambi kwitura Ibanki y’abakenyezi kugira ibaronse ingurane kugirango bashobore kurangura imigambi yisununuye, ubonako ishirahamwe KAZOZA KEZA ryashize mungiro uyomugambi rifashwe mumugongo na PNUD ryafashije ibitari bike abo bakenyezi mukubafasha kwugurura amakonti mu mashirahamwe akora nk‘amabanki ariyo bita ‘‘microfinances“ acabamenyesha ko ubu bashoboye kwitunganiriza imigambi y’ibiterambere bakava mu bukene, uwo mugambi ukaba wakoze nka MERANKABANDI I. Aho Nyakubahwa Imelde SABUSHIMIKE akaba yabwiye abo bakenyezi ko mu mugambi Merankabandi II ugiye gushirwa mungiro mu gihugu cose utazobakorerako kuko bobo baza bamaze kuva mu mirwi ya bantahonikora canke y’abafise amikoro make.
Niko guca abahamagarira kubika amafaranga yabo muri banki, na cane cane kwitura Banki y’Abakenyezi narirya intara ya Mwaro yegereye cane intara ya Gitega isanzwe irimwo icicaro gikuru c’iyo Banki, baheze bitunganirize Imigambi ihambaye, bazosigare ari abarwizatunga, bahereye kurudandazwa rutoto.
Nawe Nyakubahwa Buramatari w’Intara ya Mwaro Col. Gaspard GASANZWE akaba yarashimiye cane Ubushikiranganji bwo Gushigikirana, Imibano, Agateka ka Zina Muntu n’Iterambere Ridakumira kubona uwo mugambi waranguriwe muri iyo ntara, aca asaba ko n’ayandi makonime yoshikirwa.
Abafashijwe muri uwo mugambi bakaba barashimiye Reta y’Uburundi ibicishije mu Bushikiranganji bwo Gushigikirana, Imibano, Agateka ka zina Muntu n’Iterambere Ridakumira kubona barabiyumviriyeko bakabafasha kuva mubukene, bakemezako ubu intambwe bagezeko batacirirwa barasaba abagabo babo nka kera utwo baba bipfuza murugo, ahubwo nabo nyene baterera mw’iterambere ry’urugo, ng’ubu ntibarima gusa, ariko barorora bakongera bakadandaza.
Barerekanye ingene bigishijwe neza uko bashobora kwitunganiriza imigambi ishobora gushigikirwa, n’ingene bokora bakunguka, bakaba basavyeko Ubushikiranganji bwo gushigikirana bwobandanya bubafata mumugongo ngo bashobore gushika kure.
Mwomenya ko uwo mugambi wakoreye ku makomine ya Nyabihanga, Ndava na Rusaka zo mu ntara ya Mwaro.
